دخلت بسمه بيتها و تصرفت مثل عادتها و نومت عيالها و دخلت غرفتها
لكن بهالليله ما اخذت حبوب الصداع
و من كثر الارهاق نامت نوم عميق
حلمت بأنها تطير فوق السحاب و في ناس تصرخ عليها : انزلي انزلي انزلي
كانت مستغربه كيف تطير بدون جنحان و من هالناس اللي ينادونها
ارتفعت فوق فوق فوق و دخلت قصر كبير و لكنه قديم غرفه وااسعه و كثيره
و باخر القصر باب صغير حاولت تدخله و ما قدرت طلع لها رجال عجوز و مسك ايدها
وقال لها : تبين تدخلين
قالت:شفت كل الغرف باقي هالغرفه
قال: و تبين تشوفين هالغرفه ؟
و ظهر صوت ثاني غريب من القصر قاطع الشيخ لكن مو ظاهر اللي يتكلم يقول : لا يا بسمه اتركيه لا تسمعين لا تفتحين الغرفه
قالت : لا ابي افتحه ابي افتح يا شيخ افتح لي الغرفه و فتح لها الباب وقال : اذكري الله كثير
كانت غرفه صغيره و مظلمه ناظرت للرجال العجوز و قالت : مافيها شي ليش يقول هذاك لا تفتحين ؟!
تنهد الرجال و قال : ملعون . ملعون . ملعون
قالت: زين و شنو الغريب بهالغرفه مافيها شي
قال: يا بنتي انا بمشي و اوصيك لا تقنطين من رحمة الله و احفظي الامانه و راح عنها
صاحت عليه : يا عم يا عم يا خال يا شيخ تعال ليش تروح و تخليني بروحي شنو بهالغرفه و ليش تقول احفظي الامانه اي امانه
و ركضت و راه و هو يختفي عنها بين الممرات
و صارت تركض و تركض و تتعثر و تطيح و تركض و تنادي يا عم ياعم اي امانه ياعم لين صحيت من النوم مذعوره
الساعه 4 صباحا
لاول مره من زمن طوويل تصحى بسمه في غير وقتها و على غير عادتها
اتلفتت حولها بالسرير و بالغرفه عمر ماهو موجدود جنبها
يمكن يكون بغرفة المعيشه
اتنهدت من شدة الخوف و ذكرت الله
و اتعوذت من الحلم اللي شافته
قامت من سريرها و فتحت باب غرفتها الباب ما ينفتح
حاولت تفتح الباب و الباب مقفول خافت اكثر و ارتعبت ليش الباب مقفول و اتذكرت حلمها
و زاد خوفها و حاولت ثاني تفتح الباب لكن ما قدرت
رجعت لسريرها تفكر في حلمها و تذكر الله كثير مثل ما قال لها الشيخ بالحلم
مرت ساعه وهي على هالحاله حتى حست بان الباب ينفتح من برا
و بسرعه اتمددت في سريرها و كانها نايمه
دخل عمر الغرفه و اخذ مكانه بالسرير و اتغطى و نام
انتظرت حتى تأكدت انه نام و قامت و طلعت من الغرفه و سكرت الباب


صحيت على جوالي يرن مكالمات ورا بعضها
قمت مفزوعه مدري متى نمت و مدري اذا كنت اصلا نايمه
رحت للجوال شفت الرقم عرفتها بسمه
قلت خير عساه مكالمه خير
ايمان : هلا بسمه
بسمه بصوت مخنوق:ايمان اسفه ازعجتك
ايمان:لاحبيبتي طمنيني عنك
بسمه: الحمدلله
ايمان: وش فيك بسمه صوتك مو طبيعي
بسمه: انا خايفه
ايمان: ليش؟
و حكت لي عن الحلم و عن باب غرفتها المقفول و ليش الحلم ارتبط بالباب و ليش الشيخ يوصيها و شنو هي الامانه
ايمان: اتعوذي يا بنت الحلال من ابليس و ان شاء الله لكل شي حل
بسمه: وشنو الحل
ايمان: الغرفه كم مفتاح لها ؟
بسمه : واحد
ايمان: اجل سوي نسخه ثانيه
بسمه: اشلون و اذا عمر سالني ليش؟
ايمان: اجل هاتيه انا اسوي لك نسخه
بسمه: زين انتي مريني و خذيه و رديه قبل عمر يقوم للدوام
ايمان: و متى هو يداوم ؟
بسمه : الساعه 9
ايمان: خلاص امرك الساعه 8 انسخه و رده لك و بالمره حضري كل مفاتيح البيت و السياره
بسمه: ليش ؟
ايمان : يمكن تحتاجينها
بسمه : زين هالحين بقوم ادورها
ايمان: تمام وانا بقوم الحين و الساعه 8 بكون عندك
رحت لبيت بسمه اخذت المفاتيح و سويت منها نسختين نسخه لبسمه و نسخه لي يمكن بعد انا بيوم احتاجها
و رديت المفاتيح لبسمه و رحت لدوامي .
و صلت الى دوامي و انا افكر كيف بستفيد من نسخة المفاتيح

مر اليوم سريع بعد الظهر وصلني اتصال من عمر
عمر:صباح الخير
ايمان:ما تعرف تقول السلام عليكم
عمر: زين السلام عليكم و رحمة الله و بركاته
ايمان:يا شينك و انت تطنز اش عندك ؟
عمر:عيش وفول هههههه حلوه صح
ايمان:ها ها اي حلوه
عمر:شخبارك
ايمان:تمام
عمر:انتي معزومه
ايمان:انا ؟! وين معزومه
عمر:عازمك الشيخ عمر على الغدا باي مطعم او فندق تختارينه
ايمان: حلا و المناسبه
عمر:المناسبه يا طويلة العمر عيد ميلادي
ايمان:ههههههههه انت خبل اي عيد ميلاد مصدق نفسك بزر
و بعدين لا تقول يا طويلة العمر طويل العمر ابليس
عمر:زين طول الله بعمرك ممكن تقبلين دعوتي
ايمان:و الله للاسف علشان اعياد الميلاد حرام و انا مابي احتفل معاك بشي حرام
عمر:يعني هالحين مقطعك الحرام
ايمان :بكيفي اللي على مزاجي احلله عندك اعتراض
عمر: لا ماعندي يا طول الله بعمرك
ايمان: وغيره ؟
عمر:انتي ليش تكلميني بها الاسلوب ؟
ايمان: وانت اشلون تبيني اكلمك ؟ عمر انا متضايقه و كارهه نفسي حيل
عمر:ليش يا حياة عمر يا زين اسمي وهو طالع من حلجك
ايمان: اوف متضايقه من البنك
عمر:وراه ؟
ايمان:ابي قرض و حاطين شرط مدري اشلون
عمر:ليه بتشترين بيت ؟
ايمان:قم انت و وجهك هالحين محصلين ناكل يوم نشتري بيت
عمر:انا قلت يمكن و ليش القرض
ايمان: ابي اشتري كرسي كهربائي لامي
عمر: اها وكم حقه ؟
ايمان : 5000 دولار يعني حول 19 الف
عمر: و كم معك منهم ؟
ايمان: معي 4 الالاف و طلبت 15 الف
عمر: اقرضك ؟
ايمان: قرضتك حربايه
عمر: يا ام لسان طويل اقصد اسلفك ؟
ايمان : تسلفني الـ 15 الف كلها
عمر : ايه عادي غاليه و تستاهلين
ايمان : دامي غاليه و استاهل اجل ليش تسلفني قول هديه
عمر: امممممممم اتركيني افكر هديه ممكن تجي ليه ما تجي
ايمان: هالحين من صدقك و لا تتونس على راسي ترا الا في الدراهم ما احب المزح كلش
عمر: لا من صدقي بس بشرط
ايمان: وليل رجعنا على طير ياللي شنو بعد
عمر: توافقين على العزومه و باي مكان تختارينه
(ايمان عرض مغري بس اشلون اخذ الدراهم منه و افتك من العزومه امممممم ايه)
ايمان: زين هم بعد بشرط
عمر: اي شرط موافق بس اشوفك
ايمان: اخذ المبلغ اول و الغدا يصير عشا؟
عمر: افا مخونتني ؟
( لالالا حشاك انا اخونك هو بعد اللي سويته تبيني اعطيك الامان )
ايمان: لا مهو تخوين ولكن ضمان حقوق و علشان اروح اشتري الكرسي
عمر: زين احول المبلغ على حسابك ؟
ايمان: ايه
عمر: هاتي رقم الحساب
تأكدت ان عمر حول المبلغ بحسابي 15 الف و منتظر انفذ وعدي بقبول العزومه
و بدات افكر اشلون افتك من عزومته بعذر مقنع .


قعدت افكر في عذر اقوله لعمر علشان ما احضر عزومة العشاء
فكرت في كذا خطه لقيتها ما تمشي فقلت خليها تجي منه
انا اخذت منه اللي ابي اقتنع تمام ما اقتنع يضرب راسه باقرب جدار
اتصل عمر اكثر من مره و كنت اسفهه و لا ارد
و بعد راح الوقت رفعت الخط و مثلت نايمه
ايمان:نعم
عمر:نعم انعم الله عليك < و كان معصب
ايمان:هيه انت ايش فيك ترفع صوتك
عمر:ايش فيني ؟ تكذبين على ؟
ايمان:كذبت عليك في ايش و بعدين انت مقعدني من النوم و هاتك صراخ لا احم و لا دستور
عمر:نايمه يا ختي و انا انتظر
ايمان:ليش تنتظر؟!
عمر:عجيب نسيتي ولا كنتي تخدعيني ؟
ايمان:يووووه انت بتتكلم عدل ولا انهي المكالمه
عمر:تهددين بعد
ايمان:هيه انت قلت لك اتكلم زين ولا بقفل ايش عندك قلت لك نايمه نايمه
عمر:و ليش تنامين وين وعدك مو منتظرك اليوم ؟
ايمان:اووووووووه نسيييييييييييييت
عمر:نسيتي و لا ماتبين
ايمان:راح من بالي مره يا شيخ قايمه من الفجر و دوامين و رحت اشتري الكرسي و رجعت متاخر
حطيت راسي قلت بريح ساعه و راحت علي نومه
عمر:اسم الله عليك انتي تنامين و انا انتظر زين ردي على الجوال
ايمان:يووه انت ما تفهم اشلون ارد وانا نايمه
عمر:معقول كل ها الاتصال و ما سمعتيه ؟
ايمان:جرب اشلون حياتي و التعب اللي اشوفه و انت تعرف
عمر:طيب من الاخير بتجين ولا لا ؟
ايمان:الساعه كم الحين ؟
عمر:الساعه 11
ايمان:11 الله راح الوقت
عمر:لا ما راح الوقت باقي
ايمان:شنو اللي باقي وراي دوام بكره
عمر:اجل قولي انك متعمده ماتجين
ايمان:عمر انت الحكي معاك فاضي و ماني زايده عليه بتصدق صدق منت مصدق بكيفك
و يالله مع السلامه حتى ما تقول اني قفلت بوجهك لا تتصل و تزعجني بنام .
و قفلت الخط بوجهه و طنشت اتصالاته و افتكيت من عزومته .

استمرت اتصالات عمر لي و انا اتجاهلها
فارسل لي رساله قال فيها : الحق علي يا ايمان .
ما اكذب خفت من الرساله و من اللي سويته فيه
انا متاكده ان عمر حاس اني ضربته كف و اكيد بيرده لي
طنشت رسالته و ما رديت قلت خله يفهم اني ما اهتميت

رجع عمر الى بيته و كانت بسمه و اولادها في غرفة المعيشه
دخل معصب و صرخ فيها
عمر: قومي نومي العيال لحد هالساعه صاحيين
بسمه كانت ما تحتك في عمر كثير
اخذت اولادها و دخلتهم غرفتهم و ظلت معهم حد نامو
ثم دخلت تنام و بعد ما صارت تاخذ الحبوب
لكن كانت تسوي روحها تاخذهم قدام عمر
بهذا اليوم بسمه ما كلمتني و كنت انا انتظر منها اتصال تخبرني فيه شنو سوت .

هالليله ما كانت عاديه عند بسمه مثلت فيها دور النايمه و ظلت اكثر من ساعتين تمثل
دخل عمر الغرفه يناظرها و يناديها بصوت خافت
هي ما ردت تبي تسوي روحها نايمه
عمر ظن انها نايمه خرج من الغرفه و قفل الباب .
قامت بسمه و ناظرت للباب المقفول و قررت تفتحه
بعد مرور اكثر من ساعه خذت المفتاح و فتحت الباب بهدوء
ناظرت غرفة اولادها ما لقت شي و اطمنت
كان احساسها يقول روحي لغرفة الخادمه
كانت مليانه خوف ورعب تبي تعرف الحقيقه و ما تبي تعرف
دخلت غرفة الخادمة و لكن اتفاجئت بان الخادمه مو بغرفتها
ملاها الفضول و راحت تبحث في البيت و دفعت باب الصالون بخفه
لكن كان مقفول
اتذكرت المفاتيح اللي نسختهم لها و راحت بسرعه و خذت مفتاح الصالون
دخلته في الباب بحذر لكن ما قدرت تفتح لان فيه مفتاح بالباب من داخل
عرفت باحساس الانثى ان عمر يخونها مع الخادمه
و جلست بهدوء عند باب الصلون تنتظر متى يفتحه
مرت ساعتين او اكثر وهي جالسه عند باب الصالون حتى انفتح الباب
طلعت الخادمه من الصالون لابسه قميص نوم من قمصان بسمه الخاصه و دخلت بسرعه لغرفتها
و ما انتبهت لوجود بسمه بالصاله
و قبل يطلع عمر من الغرفه دخلت بسمه عليه
شافها عمر صابه ذهول و ركض لبس هدومه و طلع من البيت .
اتصلت علي بسمه و خبرتني بكل اللي صار و قالت لي :كان معاك حق كنت مغفله .
و سكرت الخط طلبتها اكثر من مره لكن ماردت
قلت اتركها حتى تهدى و تمتص الصدمه
لكن غيابها طول مرت 4 ايام و هي لا حس ولا خبر
قلقت عليها و بعد على نفسي
اتصلت على جوالها مغلق
تليفون البيت مايرد
عمر ما اقدر اسئله عنها
ما صار بايدي اي شي غير انها هي اللي تطلبني .
و مر الاسبوع و لا حس و لا خبر
حتى عمر ما صار يدق علي .
قلت الله يستر …..

انقطعت اتصالات عمر و بسمه بي
مافي اي وسيلة اتصال في بسمه غير جوالها و مغلق و بيتها مايرد
عمر توقف عن اتصاله بي و انا لا يمكن اتصل عليه بعد اللي سويته فيه
على الاقل يكون هو ميت بغيضه و لا اعطيه فرصه يقهرني
بيوم جاني اتصال من بسمه
شفت الرقم اتفاجئت قلت يووه يا بسمه توك تطلعين
ايمان:اهلين وينك يالقاطعه قلقتيني عليك
بسمه:الحمد لله بخير
ايمان:و ين الناس من ذاك اليوم و لا عاد بينتي طمنيني عنك
بسمه:انا في بيت اهلي
ايمان:اشلون ؟! و من متى هناك ؟
بسمه:من اسبوعين
ايمان:ليش عسى ماشر
بسمه:و انا شيقعدني بعد اللي صار خلاص اهلي يتصرفون
ايمان: و الله ما ادري شقول
بسمه:ايمان فيك تزوريني بيت اهلي ؟
ايمان:ايه حبيبتي عطيني العنوان
بسمه:تعالي من قريب و نتكلم براحتنا
ايمان:خلاص حبيبتي بعد الدوام على طول امرك .
اخذت العنوان منها و بعد خلص دوامي رحت لبيتهم و اول مره اشوف اهلها
كانوا ناس طيبين حيل و امها و خواتها حبوبات
قعدنا مع بعض و تعرفنا و بعد وقت تكلمت مع بسمه على انفراد
ايمان:هالحين انتي ايش بتسوين ؟
بسمه:ما اكذب عليك خلاص عافته نفسي و بعدين انا علمت اهلي بكل شي
ايمان:و شنو قالوا ؟
بسمه:ابوي و اخواني مو قاهرهم الخيانه قد قهرهم بانه كان يعطيني منوم
و كان اخوي الكبير يبي يروح يبلغ عليه لكن ابوي منعه و قال مانبي فضايح
نسرح البنت منه بالاحسان و قال هذا خلاص ما عاد ينوثق فيه اشلون بتاكل معاه اشلون بتنام معاه
هذا ما حافظ على الامانه اللي خذاها منا
ايمان:و انتي شنو قرارك؟
بسمه:انا قراري من قرار اهلي
ايمان:و ليش ماتعطونه فرصه يمكن يتغير
بسمه:اشلون نعطيه فرصه ؟ قلت لك لو هي مسئله خيانه كان قلت علشان الاولاد اعديها
و من ورا قلبي لكن اشلون ائتمنه على روحي و اشلون بأتمنه على الاولاد ايمان عمر وصل معاي لحد
مستحيل اتقبله و شنو السبب ولا شي بس لاني كنت واثقه فيه!!!
ايمان:الله يهدي حالكم
بسمه:ان شاء الله هذا هو الحل ابوي بعد هو اللي اتخذه معاي و مقرر عليه
ايمان:زين عمر يدري بها القرار ؟
بسمه:ايه يدري و ابوي كلمه و طلب طلاقي منه
ايمان:و شنو كان رده ؟!
بسمه:رافض يقول مالها طلاق ابيها ترد لكن ابوي قال له تبي تجيب طلاقها بالطيب قبل القوه
و هذا حنا منتظرين الورقه
ايمان:و الاولاد ؟
بسمه:الاولاد ماهو بشايفهم هذا كفوا احد يثق فيه الحمد لله بس على هالحال .
الحقيقه ماكنت اتوقع توصل هالدرجه كنت ابيها تفتح لبيتها و لزوجها
ما انكر اني كنت ابي انتقم من عمر لكن وجود بسمه في حياته
و قربي منها و معرفتي باحوالها غير كل مخططاتي
صار همي اشلون تنتبه هالزوجه لنفسها
كان ودي اخبر بسمه بكل شي على الاقل احس براحه ضمير
لو ان ضميري ما بيرتاح لكن على الاقل اكون ريحت نفسي و اعترفت
في كل مره اقابلها او اكلمها او اشوفها ابي اقول ولكن يمنعني الخوف
و بمره استجمعت قوتي وخبرتها
سمعت مني بكل هدوء من اول ما عرفت عمر بايام الجامعه
حتى هذي اللحظه اللي انا اعترف فيها
و سمعتها كل مكالمات عمر لي و كل اللي كان يقوله
كنت اخاف تطردني او تشتمني او تسبني
لكن قلت حلالها تسوي اللي تبي اهم شي اعترفت لها
و فاجئني ردها اللي كان:
كنت مقتنعه بقراري بالانفصال و الحين زاد اقتناعي اكثر
انتي ما تنلامين اللوم على الرجال اللي يخدع زوجته و ام عياله بدون اسباب
و كثر الله خيرك باللي سويتيه معاي لو وحده غيرك كان استغلت الامور لصالحها
انتي غلطتي لكن مسموحه يا بنت الناس و محلله و ماشفت منك الا الخير .
كان تسامحها معاي هي القوه بعينها
كنت اعتبر نفسي قويه و جريئه لكن عرفت انه في قوه اكبر من قوه البطش وهي قوة التسامح
تذكرت امي و تذكرت كلامها (و الكاظمين الغيض و العافين عن الناس و الله يحب المحسنين)
آه يا بسمه انتي كثير تشبهين امي.
************
بعد ردتي من عند بسمه اتغيرت افكاري و بديت احاسب نفسي على كل شي
فكرت ادق على عمر و اشوف شنو مسوي
لكن اشلون اتصل عليه بدون ما احرج نفسي اممم بفكر بطريقه
و قلت اتصل رنه و اسكر
و فعلا بعدها اتصل علي
ايمان:هلا
عمر:اهلين كيف الحال
ايمان:الحمدلله
عمر:طلبتيني
ايمان:انا لا ؟!!
عمر:اشلون لا ؟ هذا رقمك جاني رنه و سكرتي
ايمان:لا لا يمكن غلطت
عمر:زين اجل فرصه اللي سمعنا فيها صوتك وين الناس
ايمان:موجوده بالدنيا
عمر:ياحظك . فينك من يومها مختفيه
ايمان: لا مختفيه ولا شي بس مشغوله و انت اللي اختفيت
عمر:مشاغل
ايمان:شنو هالمشاغل
عمر:يهمك تعرفين
ايمان:اذا ماتبي تقول لا
عمر:عادي مشاكل و ضغوط في البيت و العمل
ايمان:في العمل و فهمنا في البيت ما اضن زوجتك حبوبه
عمر:ايه حبوبه على الطاري تكلمينها
ايمان:لا للاسف قلت لك مشغوله هاليومين ليش؟
عمر:لا ولا شي
ايمان:ليش في شي
عمر:لا مافي ليش تسالين؟
ايمان:لانك انت سالت
عمر:امم بصراحه في مشاكل في البيت
ايمان:شنو؟
عمر:يعني تعرفين فضاوة حريم غيره وماغيره و كلام فاضي
ايمان:هههههههه منو يغار بسمه ؟
عمر:تخيلي عاد تغار من الخادمه اما مستوى في احد يغار من خادمه
ايمان:لا حشى ليش تغار وشنو جاب مستوى للثاني
عمر:عاد هذا انتي قلتيها سخافة حريم وزعلانه ورايحه لاهلها ولا بعد تبي الطلاق
ايمان: طلاق ؟!
عمر:شفتي عاد لوين السخافه عشان غيره و خادمه تخرب بيتها
ايمان:اجل ليش ماتريحها
عمر:اشلون اريحها؟
ايمان:تشيل الخادمه
عمر:لاعاد ماني ولد ابوي حرمه تتحكم فيني قال اشيل الخادمه لا هذي بالعناد بخليها علشان تتعلم تثق فيني
ايمان:شنو عناد ومو عناد وبعدين بسمه مو من النوع الشكاك اكيد صايده عليك شي
عمر:يالله عاد انتي الثانيه بديتي شغل الحريم
ايمان:ليش وش فيهم الحريم
عمر:شكاكات وماعندكم منطق ولا سالفه و لا ثقه بالنفس بس تبون الرجال خاتم باصابعكم
ايمان:وليش مو من حقنا
عمر:لا مو من حقكم و بعدين الرجال حر الشرع حلل له 4 غير ملك اليمين
و لا تجي وحده منكم تتفلسف و تقول ابيه لي بروحي
ايمان:ايه هذا انت قلتها بالشرع
عمر:وش قصدك
ايمان:ولا شي بس انت ليش منفعل ؟
عمر:ماني منفعل
ايمان:لا منفعل واذا مو منفعل ليش تجمع ؟
عمر:اجمع لانكم كلكم كذا بس لا تتعبون انفسكم الرجال ما تملى عينه وحده
ايمان:و ليش ما تملى عينه وحده ؟
عمر:كذا هو كذا ربي خلقه كذا ما تملى عينه وحده الرجال ما يملى عينه الا التراب عينه فارغه و الحرمه الشكاكه العنيده ام المشاكل
تزيد فراغها فراغ لو هي ملكة جمال
ايمان:لكن بسمه مو شكاكه و لا عنيده
عمر:سلبيه و بارده ولا فيها روح
ايمان:مو عذر غيرك يسميها هاديه و مسالمه و قنوعه نظرات الناس تختلف
عمر:بس انا ما احب هالشي
ايمان:و ليش ما قلت لها
عمر:انا بقعد اربي فيها
ايمان: وليش لا ! يقولون المره من رجالها و الفرس من خيالها
عمر:عاد انا مو فاضي لها عاشرتني سنين و اكيد تعرفني
ايمان:ههههه وانا بعد عاشرتك سنين و ما عرفتك
عمر:ايش تقصدين ؟
ايمان:شنو اقصد ؟ اقصد انك يوم تشتهي تعطي لون تعطيه ويوم تشتهي تغيره تغيره . عمر ابي اقلك شي
عمر:شنو؟
ايمان:تذكر الفلوس اللي خذيتهم منك ال20 الف و قلت لك ابيهم حق علاج امي و كرسيها
عمر:ايه اذكر بس ليش هالدخله غيرتي الموضوع 180 درجه
ايمان:لا ماغيرت بس يوم قلت معاشرتني سنين و المفروض تعرفني قلت ما دامك تعترف بانك مثل ما انت ماتغيرت
اجل انا بعد بعترف لك بشي و اظن بتسامحني هذا اذا كنت على كلامك ماتغيرت
عمر:خير وشنو اعترافك؟
ايمان:الفلوس اللي خذيتهم منك اخذتهم كذا لا انا محتاجه ولا شي بس كنت اختبرك بشوف تعطيني و لا لا
عمر بعد سكوت: كنت عارف
ايمان:هههههههه لا عاد لا تسوي فيها كنت عارف تلقط وجهك بس
عمر:لا كنت عارف انك تختبريني و كنت ابي اعطيك الامان
ايمان:تعطيني الامان ب20 الف انت حيل كريم
عمر:ما انكر اني كنت فعلا اظن انها للوالده لكن بعد كنت اقول انه اختبارك منك
ايمان:زين هالحين مسامح ؟
عمر:لو ما كنت مسامح ما جاريتك في طلبك
ايمان:زين حلو شي جميل يا حليلك طيب . زين بعترف لك بشي ثاني
عمر:هاه شنو بعد اعترافاتك اليوم كثير
ايمان:اممممممم انا اللي قلت لبسمه عن المهدئ و عرفتها شنو هذا الدواء و نبهتها منه
عمر:شنو قلتي ؟
ايمان:اللي سمعته انا اللي قلت لها عنه و حذرتها تاخذه ليش انت كنت منتظر اسكت على هالجريمه ؟
عمر بانفعال:انتي من صدق تكلمين انتي يا ايمان؟
ايمان:ايه من صدق و بعد انا اللي ناسخه لها مفاتيح البيت و انا اللي قايله لها تراقبك و عرفت منها انها صايدتك مع الخادمه وع ياقرفي
عمر:انتي سويتي كل هالشي وانا ياغافل لك الله
ايمان:ايه انا مو توك تقول ما بينك وبين الخادمه شي . يكون بعلمك ادري عن كلللللل شي و ادري الحين ان زوجتك طالبه الطلاق
عمر:و ليش يا ايمان تسوين كل هذا هذا جزاتي اللي دخلتك بيتي و عرفتك على زوجتي
ايمان:و انا بعد وثقت فيك و شنو سويت بثقتي فيك
عمر:تنتقمين مني ؟؟!!
ايمان:لا مو انتقام رد دين ما انكر اني كنت ابي ادمرك و اكرهك بحياتك لكن لقيت في بيتك انسانه تستحق الاحترام
و ما كانت تستاهل تكون تحت ذمتك
قلت اوعيها و اصحيها لك و للقرف اللي انت معيشها فيه .
سميها غدر سميها خيانه سميها حقاره اللي تبي لكن تذكر انك انت اللي جنيت على روحك .
عمر:لها الدرجه قلبك اسود!
ايمان:ايه اسود و ازرق بعد انت تستاهل . و هذا انا قلت لك سوي فيني اللي تبي بتشتكيني لابوي؟ اذا تدل قبره روح . بتشتكيني لامي؟
قبل توصل الباب بينقبض عليك . بتروح تعلم اعمامي؟ و طز فيك و فيهم . بتفضحني ؟ قبل تفضحني بتفضح روحك اول سؤال بيتوجه لك
وانت ليش تدخلها بيتك و تعرفها على زوجتك ؟!
عمر:يا حقيره
ايمان:ههههههه عاااااااااادي مثلك و على فكره بسمه تعرف كل شي و سمعتها كل مكالماتك لي و شافت رسايلك
و بها الطريقه مستحيل ترجع لك
هذا دين رديته لك و كنت ابي اسوي فيك اكثر لكن انت ما تستحق اهم شي هالانسانه المسكينه اللي عندك افتكت منك
و يمكن اكون انا رحمه من الله علشان تشوف قذارتك .
عمر: ما شافت عيني اقذر منك وعيالي شنو ذنبهم ؟
ايمان:عيالك قبل تسالني عنهم اسئل روحك عنهم لو يهمونك ما سويت هالشي
اسمع هالحين بسكر الخط و اياني و اياك عاد تدق علي او توصل باب بيتنا توقع اني اسوي فيك اي شي لاني بايعتها بتراب
عمر: تراب في وجهك يا بنت الكل…
ايمان: مقبوله منك على قد سنك . سلام يا كابتن .
قفلت الخط و كانت هذي اخر مكالمه بيني و بين عمر و صلني بعدها عده مسجات و مكالمات
و كلها سب وشتم ما التفت لها لانه يستحق .
حاليا مازال الوضع كما هو عليه بسمه و اهلها طالبين الطلاق و يفكرون بالخلع
عمر رافض طلاق بسمه . اجر شقته و عايش مع امه .
—————————
اخيرا :
ليست كل زوجه كبسمه
و ليس كل زوج كعمر
و ليست كل أمرأة اخرى كإيمان
***************************
القصه للعضه و العبره ليست للمفاخره او الاستعراض او للتحريض
بل تفتح عده جوانب للمجتمع : الفتاة و المرأة و العشيقه و الرجل .
***
لا اعرف كيف اصف احساسي و لكن اعرف اني مخطئه .
واصبحت إمرأة اخرى

أنتقآمها قووووي حيل
صحيح عمر يستآهل لأنه أجرم
بحقها كثير .. لكن صدق أولاده يكسرون الخآطر ..
و بسمة للآسف فيه مثلها كثير بمجتمعنا و حقوقهم مهضومة ..



شهرزآد ..}

ربي يعطيك العآفيه حبيبتي
على القصة الجميلة ..,

عذووب
الله يعافيك

مشكوووره عالمرور

شهر زاد


من جد قصه خطيره والاسلوب كمان حلو



ويعطيكي الف عافيه


وبصراحه مادري فين الردود مع انها قصه حلوه

وتقبلي مروري

مساله وقت
يعافيك عالمرور ...

مادري مافي ردوود>>>>>>يمكن ماعجبتهم القصه

مرسي على القصهـ الرائعهـ ...
كل شئ فيها حلو والاحلاء طريقهـ الانتقام ...
أكرر شكري ...

مشكووووووووووور مجهود بس تبي لها ايام من القرائه وانا مشغوله

تحياتي

شهرزآد..~


وربي مرررة مرررة مرررة روووعهـ

لآعدمتك




عوآفـي