والله يابـو ضحكـة ٍ فيهـا نهـاريـن = قبل اتكسّـر علـى صورتـك الأوزان
لقيت فيهـا السمـا والأرض والطيـن = وتاريخ غامض بـلا معنـى وعنـوان
فـخيوطهـا ثرثـرة شاعـر وقافيـن = وبحر ٍ تحت زرقته لولـو ومرجـان!
وفيها مـن التـوت مايغريـك يالتيـن = ومـن الثمـر لاتدّلـى عَقْـد رمّــان
وفيها العنب سلسل غصـون البساتيـن = يـوم البنفسـج تحضنهـا بالاحضـان!
سْقوفها مـن زبرجـد طّـل مابيـن = ستايـر ٍ مـا حكـت للريـح نسيـان!
يسولـف السمـع فيهـا جنـب ليليـن = لين اختنـق شمعـدان وطـار دخـان!
فيهـا تلّفـت يسـار وعينـك يمـيـن = وعلـى التفاتـك يصـب الغيـث ودان
وعلـى شفاهـك تلعثـم حـدّ سكيـن = وخيانـة الأحمـر النافـر لـلالـوان!
كن الخشـب فـي براويـزه ربيعيـن = وأنهار وأعشاب في صـدري وهتـان
يحرث بها الظل حبْـر وتزهـر يديـن = ويحفر لها الحلق صوت وينطق لسان!
وتجلس وفي جلسْتك يبيّـض نسريـن = وتاقف وفي وقفتـك ينهـار وجـدان!
وكم حاجبـك عقّـل هْبَـال المجانيـن = وكم هي رموشك تجَغْرف بيد و أوطان!
وكم رغّدت خـدك عْيـون الفقيريـن؟ = وكم في عيونك سَرح طرقي وهجّـان!
ماقلت في صورْتك حـرب ومعاديـن = ولاقلت فيهـا رمـي بنـدق ونيشـان
أقـول فيهـا يزغـرد صبـح ويبيـن = وأطير فيها ..سما..من غيـر جنحـان!
أو قـل طريـق ٍ تواعـد فيـه قلبيـن = واحد نسى قلب واحـد كـان ولهـان!
لين احترق فـانتظاره وامتلـت عيـن = وانهدمت ضلوع في صدره وجـدران
وياهـي ملامحـك يشربهـا الغريبيـن = ومن أربعين الشبـه ماتشبـه إنسـان!
أشوفها اصْدق من دمـوع المساجيـن = اليا اطلبوا رحمة ٍ مـن كـف سّجـان
وأحـس لاشفتهـا تاقـف بـي سنيـن = وإن جيت بـاصد عنها..تمضي ازمان!
وأشوفهـا جملـة ٍ مابـيـن قوسـيـن = تفسيرها الدمـع والحيـرة والأحـزان
شبّرتهـا ماتجـي بالطـول شبـريـن = لكنهـا السرمديـة بعـض الاحـيـان
وباقي مـن الثلـث ليـل وراح ثلثيـن = وأنا اتدّفـى علـى صورتـك بـردان
سامرتها وانفجـر شاعـر وصدريـن = ومْن الولـه والحنيـن ارتبكـت أوزان
لين نْعَسَت عين..وشوي نْعَسَـت عيـن = ونمت وتركتك تحاكي صمت الالـوان!